Cha oxpam lumetik yu’un bats’il ants winiketik nok’ol sujbelik ilel yu’un te chamel coronavirus, te yantike ya sp’ajik te ik’eltajilel ta na sok yakaspasik k’inetik yu’un te kuxibal. (Tseltal)
Video:
Audio:
Nok’ol awaiybel, jun k’op ayej te bajem ta swenta yu’un te bats’il antswiniketik ta Chiapas, te chajpambil yu’un te Noticiero Chiapas Paralelo, te ya x-a’tej sok te Alianza de Medios de la Red de Periodistas de a Pie.
Sábado sbuluchebal sk’jak’alel abril yu’un 2020
Te Secretario yu’un Salud, yu’un te gobierno federal ta México, Hugo López Gatell, la yal te ta jujun chamel yu’un coronavirus te ya stajik ta ilele, aytomexan waxakeb chameletik te matoba stajojik ta ilel. Ja’ ya sk’ana yal te li’ ta muk’ul jlumaltik k’axem ta 26 mil te mach’atik tsakatik ta chamele.
Ta Chiapas, ta slajunebal yu’un abril la yak’ik ta nael te ay waxaklajuneb scha’winik te mach’atik ay schamel te kuxatik-to, sok cha’tul te lajemikix.
Te mach’atik tsakatik ta chamele ay jtul ants yu’un Salto de Agua, te yakal a ta kuxinel ta Cancún, Quintana Roo. K’alal la sch’ay te ya’tel sujtal ta Chiapas. te yane ja’ jtul winik yu’un Tumbalá, te tsakot ta chamel k’alal bajt ta Villahermosa, Tabasco.
Sok ay chameletik ta Tuxtla Gutiérrez, San Cristóbal de las Casas, Tapachula, Palenque, Comitán, La Independencia, Chicomuselo, Chiapa de Corzo, sok Suchiapa.
Te ajwaliletik yu’un México sok Chiapas ya yalik,te yu’un maba xpujk te chameleya sk’ante ants winiketik ya x-ayinik ta yut snajik, ja’nax xlok’atik teme animal ta k’anele,temextu’un ta bayalte bin ya atuune, sok mame atsobabajik ta bayal.
Te ayinel ta yut na maba ya xu yu’unik te mach’atik ya xlok’ikta a’tel sok telej a’teletik. Ta México bayal te mach’atik mayuk ya’telikja’ swenta te maba xu yu’unik te ya xjilik ta na.
Te yantike la sk’anik lok’el yu’un sk’intayel te kuxibal. Ta San Juan Chamula, Venustiano Carranza sok San Juan Cancúc, maba la sch’unik te tsitsel yu’un te jilel ta na, sok bayal te mach’atik kojtik ta k’inetike.
Ta yantik municipio, jich bit’il ta Chilón sok Sitalá, bats’il ants winiketik tenawanik ta swenta te mayuk a’teletik yu’un stejk’anel sok k’op ayejetik ta bats’il k’op ta slumalik, yu’un jich ya snaik bin a’telil ya spasik yu’un maba stsakotik ta coronavirus, sok snael bin ut’il ya yilik te mach’atik ya stsakotik ta chamele. La yalik te maba ayuk yu’unikte mach’a x-a’tej ta nail poxil sok mayuk poxetik.
Pascuala Vázquez Aguilar, te ya xk’opo ta jwentatik ta Concejo yu’un Gobierno Comunitario ta Chilón, te banti stsobo sbajik 600 ch’in lumetik yu’un tseltaletik, la schol, te ta stukelik te cha’ oxpam ch’in lumetik la schap sbajik ta slejel sp’isubiletik yu’unk’ajk, sok jtebuk poxetik swentayilel te k’ajk. ja’nax yu’un maba tik’a.
La xchol te ay bats’il ants winiketik te nok’ol xchajpanbel sbajik te bit’il ya yil sbajik teme tsakotik ta chamele, sok te bats’il poxiletik.
Li’ taChiapas Paralelo yatome jcholbeyexkotik te bintik ya xkojt ta pasele. te k’op ayej ini chajpanbil sok spatrocinio yu’un DW Akademie.
Traducción (sk’asesel k’op ayej): Juan Gabriel López Ruíz
Locución (xcholel k’op ayej): Juan Gabriel López Ruíz
Gracias a:
Sin comentarios aún.